Fyrsta umferð

Fálkar fengu það verkefni að fást við 52 Copas, skemmtilegt lið frá Madrid. Fyrir mótið renndu Fálkar að sjálfsögðu blint í sjóinn og gerðu sér ekki von um nema í mesta lagi einn eða tvo sigra á mótinu. Eftir fyrsta leik var markmiðinu náð. Spánverjarnir byrjuðu reyndar betur í leiknum og höfðu Fálkar á orði að það hefði tekið þá tvær umferðir að kynnast ísnum (eða ísinn tvær umferðir að kynnast þeim). Spánverjarnir komust í 3-0 en Fálkar héldu ró sinni og jöfnuðu leikinn í fjórðu umferðinni. Þeir lentu síðan aftur undir en jöfnuðu aftur og sigruðu síðan 6-4.

Fálkar	0	0	3	0	1	2		6
52 Copas (Spánn)	2	1	0	1	0	0		4

 

Önnur umferð

Síðar á fyrsta keppnisdegi lá fyrir Fálkum að leika gegn sigurliðinu frá því í fyrra, Home Guard. Fyrirliði (skipper) liðsins er Alan McDougall en hann á meðal annars að baki heimsmeistaratitil unglinga í krullu 1991 þegar hann stýrði liði Skota til sigurs. Hann keppti síðan fyrir Englands hönd á Evrópumótinu 1995 og á Evrópumóti blandaðra liða í fyrra þar sem liðið náði 9. sætinu af 21 þjóð. Raunar má bæta því við að Fálkar léku gegn örðum leikmanni sem lék með Alan á því móti. Alan var einnig þjálfari enska kvennaliðsins á Evrópumótinu 1999. Annar liðsmaður heimavarnaliðsins var eigandi krulluklúbbsins, Ernest Fenton.

Þrátt fyrir allt sýndu Fálkar liðinu þó enga óþarfa virðingu og léku ágætlega. Keppnisferill andstæðinganna er hins vegar engin afsökun en þrátt fyrir góðan leik Fálka, hugsanlega þann besta hjá einhverjum þeirra, var við ramman reip að draga. Þó svo Fálkum tækist að leggja upp erfiðar stöður náði Alan McDougall oft og tíðum ótrúlegum skotum og allt sem hann reyndi virtist takast. Fálkar gengu því keikir af svellinu þrátt fyrir stórt tap því hver umferð fyrir sig var spennandi en þegar upp var staðið höfðu heimamenn þó unnið 6 umferðir en Fálkar aðeins eina.

Fálkar	0	1	0	0	0	0	0	0	1
Home Guard	1	0	1	3	1	1	2	2	11

 

Þriðja umferð

Í þriðju umferð áttu Fálkar í höggið við Forbes’ Rusties en í því liði var meðal annarra Forbes Fenton, sonur eiganda klúbbsins. Forbes var einmitt einn liðsmanna í liði Englands á Evrópumóti blandaðra liða sem áður var minnst á. Hann varð hins vegar fyrir því óláni í næsta leik á undan að detta á svellinu og lenda illa á einum steininum, líklega með þeim afleiðingum að bráka rif og gat því ekki leikið gegn Fálkum. Leikurinn gegn Forbes’ Rusties var jafn og spennandi en Fálkar misstigu sig í lokaumferðunum og misstu af góðum tækifærum. Leikurinn var jafn og spennandi allan tímann og lokatölurnar, 2-8, dálítið úr samhengi við þá baráttu sem átti sér stað í hverri einustu umferð.

Fálkar	0	1	0	0	1	0	0	2
Forbes’ Rusties	1	0	1	1	0	2	3	8

 

Fjórða umferð

Útlitið eftir þrjár umferðir var ef til vill ekki gott þar sem Fálkar unnu aðeins eina umferð í öðrum leik sínum og tvær í þeim þriðja. Þegar upp var staðið voru þessir leikir hins vegar gegn liðunum sem enduðu í 1. og 3. sæti. Þrátt fyrir þessa stöðu báru liðsmenn höfuðið hátt enda hafði liðið leikið vel og átt skemmtilegar stundir á svellinu og utan þess. Andinn í liðinu var góður og leikmenn staðráðnir í að koma heim með fleiri en einn sigur í farteskinu.

Síðdegis á laugardag fór fjórða umferðin fram en fyrir hana var liðunum skipt í efri og neðri deild. Þrátt fyrir að hafa aðeins unnið einn leik af fyrstu þremur komust Fálkar í efri deildina, það er í hóp 6 efstu liða af 12.

Í fyrri umferðinni í úrslitum léku Fálkar gegn liði sem kallar sig Cambridge Affiliates og inniheldur meðal annars Claire Grimwood, einn liðsmanna úr blönduðu landsliði Englands frá Evrópumótinu 2005. Snemma í leiknum náðu Fálkar góðu forskoti sem þeir neituðu að láta af hendi og sigruðu að lokum 7-4.

Fálkar	1	0	4	0	0	1	0	1	7
Cambridge Affiliates	0	1	0	1	1	0	1	0	4

 

Fimmta umferð

Eftir fjórðu umferðina var orðið ljóst að Fálkar ættu erfitt með að berjast um þriðja sætið á mótinu og þar kom í bakið á þeim hve fáar umferðir þeir höfðu unnið í sínum leikjum. Ef lið enduðu jöfn að stigum var þeim raðað eftir fjölda unninna umferða í öllum leikjum og ef þau voru þá enn jöfn skipti máli hve marga steina þau höfðu skorað. Fálkar hefðu þurft að vinna allar umferðirnar í lokaleiknum og treysta á hagstæð úrslit í öðrum leikjum til að ná þriðja sætinu. Liðið setti sér því raunhæft markmið í lokaleiknum, að vinna leikinn og ná fjórða sætinu. Keppinautarnir voru lið frá Ice Melters klúbbnum, sem er blanda áhugasamra leikmanna víða að. Í liðinu voru hjón frá Bristol, einn leikmaður frá London og einn Þjóðverji. Í þetta sinn gekk heppnin í lið með Fálkum og nokkrum sinnum kom góð útkoma eftir skot sem ekki tókust eins og til var ætlast.

Fálkar	0	1	2	1	0	1	2	7
Ice Melters	1	0	0	0	2	0	0	3

 

Liðsuppstilling í öllum leikjunum var þessi:

1. Árni Arason
2. Bjarni Sæmundsson
3. Þorgeir Einarsson
4. Haraldur Ingólfsson

Þegar litið er á skor liða gegn Fálkum kemur í ljós að aðeins tvisvar fékk liðið á sig 3 stig í umferð, fjórum sinnum 2 stig og 14 sinnum 1 stig. Fálkar náðu sjálfir að skora 4 stig einu sinni, 3 stig einu sinni og 2 stig þrisvar. Litlu munaði í einum leiknum, gegn Forbes’ Rusties, að Fálkum tækist að skora 5-6 stig í einni umferðinni en slíkt skor hefði nær gert út um leikinn.

Þegar upp var staðið vantaði Fálka aðeins að hafa unnið fjórum umferðum meira til að ná liðinu sem var í þriðja sætinu. Fjórða sætið er hins vegar árangur sem liðsmenn eru ánægðir með enda vann liðið þrjá leiki af fimm.

 

Úrslit mótsins

(ef lið voru jöfn að stigum skipti fjöldi unninna umferða máli en ef þau voru þá enn jöfn skipti máli hvort skoraði fleiri steina á mótinu).

Efri deild

Sæti	Lið	Stig	Umferðir	Steinar
1.	Home Guard	10	24	47
2.	The Sharpies	8	20	40
3.	Forbes’ Rusties	6	19	32
4.	Fálkar	6	15	23
5.	Ice Melters	4	18	32
6.	Cambridge Affiliates	4	18	29

Neðri deild

Sæti	Lið	Stig	Umferðir	Steinar
1.	Opel Fruits	6	11	24
2.	Kristy’s Clan	4	20	31
3.	John Brown’s Bodies	2	18	20
4.	Fyfe Family	2	16	28
5.	52 Copas	2	13	23
6.	Chris’ Cronies	2	9	19

Niðurstaðan varð sem sagt þrír sigrar en tvö töp. Sá árangur er umfram þær væntingar sem liðsmenn gerðu sér fyrir mótið. Meðal liðsmanna var Bjarni Sæmundsson úr Krulludeild Þróttar en hann hafði aðeins spilað krullu í nokkur skipti áður en hann hélt til Englands. Til að bæta gráu ofan á svart lenti hann í mikilli seinkun á flugi, þurfti að bíða í Leifsstöð frá miðjum degi á fimmtudegi og fram á nótt. Hann var ekki mættur á hótelið fyrr en um klukkan 5 á föstudagsmorgni, aðeins um 5 tímum fyrir fyrsta leik. Það kom ekki í veg fyrir að hann stæði sig vel og ætti fullan þátt í góðu gengi liðsins.

Áfram Fálkar!    

Fleiri myndir hér...

---